Mmm

Einkalíf dönsku sjónvarpsstjarnanna

HUNH! Durururumm... Komið sælir, lesendur góðir. Mig langar að kynna tvo prýðismenn fyrir ykkur, en þeir heita Arne og Bjarne og eru frá frændríki okkar Danmörku. Þeir eru ólíkir um margt en saman mynda þeir alveg ótrúlega sterka markaðslega heild. Þið þekkið þá af skjánum en nú er kominn tími til þess að við skyggnumst undir yfirborðið og komumst að því hvern mann þeir hafa að geyma undir sjónvarpsstjörnuyfirborðinu.

Arne heitir annar, þrekinn maður, ljós yfirlitum en þungbrýndur mjög. Arne er á fimmtugsaldri og býr í nýlega uppgerðri blokk í úthverfi Kaupmannahafnar. Arne starfar sem skólaliði en á einnig að baki feril sem starfsmaður verkstæðis sem sérhæfir sig í viðgerð heimilistækja. Arne er maður afar fastheldinn á vini og nýtur frístundanna best í vinahópi að horfa á sjónvarp eða spila á spil. Arne er ógiftur og barnlaus, en heyrst hefur að hann eigi nú í bréfasambandi við eina af þekktustu sjónvarpsleikkonum Dana.

Bjarne heitir hinn, hár og grannur maður um fimmtugt, kíminn og brosleitur, sem gengur jafnan um með sólgleraugu. Bjarne vann fyrir nokkrum árum rúmar tvær milljónir danskra króna í lottói og flutti þá ásamt föður sínum í fallegan heilsársbústað á Suður-Sjálandi, þar sem þeir una sér við dorgveiðar. Bjarne finnst gaman að rúnta um á Ford Escort-bifreið sinni. Hann er áhugamaður um skák og teflir stundum á netinu undir heitinu „Bjarne".

Arne og Bjarne voru uppgötvaðir þar sem þeir voru í faðmlögum í sínum fyrsta tíma á gömludansanámskeiði. Þeir léku síðan í auglýsingu fyrir stórt fyrirtæki í heimalandi sínu sem framleiðir og selur málningarvörur. Þar þóttu þeir ná svo vel saman að ákveðið var að hefja stórkostlega útrás í markaðsmálum sem byggðist á ótvíræðum hæfileikum og útgeislun þeirra félaga. Þannig vildi það til að Arne og Bjarne birtust á skjánum okkar, undir íslensku listamannsnöfnunum Atli og Gísli, og lífguðu upp á tilveruna. Og fyrir það erum við þakklát. Takk, Arne og Bjarne!

Magnús birti @ 12:04 f.h.